Akuzohet për 23 raste të shkeljes së barazisë në tendera. Prokuroria nisi hetimet bazuar në kallëzimin e KLSH
Gjykata e Durrësit vendosi masën ndaluese “pezullim nga detyra” për drejtoren e spitalit rajonal, Ardjola Frashëri, e akuzuar për shpërdorimit të detyrës përmes shkeljes së barazisë në tendera. Kërkesa është bërë nga Prokuroria e Durrësit, bazuar në kallëzimin e Kontrollit të Lartë të Shtetit, i cili ka audituar veprimtarinë ekonomike të Spitalit Rajonal të Durrësit për periudhën 2013-2015.
Prokuroria njofton se nga hetimet ka rezultuar se, në të paktën 23 raste, drejtorja Frashëri, si edhe ish-drejtori Taulant Baku, i cili gjithashtu është nën hetim, kanë urdhëruar kryerjen e prokurimit publik me procedurën e “Negocimit pa njoftim paraprak”. Në bazë të ligjit “Për prokurimin publik”, kjo procedurë aplikohet vetëm në raste emergjente. Sipas raportit të Kontrollit të Lartë të Shtetit, dëmi ekonomik llogaritet në vlerën e rreth 70 milionë lekëve.
Pasi ka marrë vendimin e gjykatës për pezullim nga detyra të drejtoreshës Ardjola Frashëri, Prokuroria e Durrësit ia ka dërguar për zbatim Ministrisë së Shëndetësisë. Ndërkohë, për ish-drejtorin Taulant Baku, nuk është kërkuar masë ndaluese, për faktin se ai nuk është në funksion publik.
