Partia Demokratike nëpërmjet sekretares për marrëdhënien me publikun, Grida Duma akuzoi kryetarin e bashkisë së Tiranës, Erion Veliaj se po përpiqet të fshehë të vërtetën në lidhje me atë që PD e quan aferë korruptive në lidhje me landfillin e Sharrës, ku disa javë më parë u gjet i vdekur 17 vjeçari, Ardit Gjoklaj.
Duma: Këtë thirrje ka bërë Erjon Veliaj me 16 mars të këtij viti. Pra lini punën e paligjshme dhe hajdeni në landfillin e Sharrës. Ardit Gjoklaj e shumë të tjerë iu përgjigjen kësaj thirrje. Po ajo çfarë gjetën atje, ishte një mashtrim i madh i Erjon Veliajt. Të mitur, burra e gra që punonin të pasiguruar. Shfrytëzoheshin deri fëmijë 10 vjeç.
Bashkia Tiranë: Çdo ditë përballemi me sulme politike, të cilat nuk i shërbejnë as punës sonë të përditshme, as qytetit tonë. Këto sulme bëhen edhe më absurde kur vijnë pikërisht nga ata njerëz që për katër vite me radhë zgjodhën të flinin gjumë, duke e lënë qytetin në mëshirë të fatit e që për 4 vjet nuk zgjidhën, edhe pas shumë aksidenteve, çështjen e landfillit të tejmbushur të qytetit, i cili për faj të po këtyre njerëzve kishte degjeneruar në një fushë-betejë për grumbulluesit e mbetjeve. Bashkia e Tiranës ka qenë dhe vazhdon të jetë në krah të institucioneve ligjzbatuese, duke ofruar të gjithë ndihmën për një hetim të plotë të kësaj ngjarjeje e vënë përpara përgjegjësisë cilindo kontraktor që nuk ka respektuar këto rregulla. Na vjen keq të shohim se si për çdo fatkeqësi, aksident apo çdo moment të pafat, është gjithmonë Partia Demokratike, një parti e fatkeqësive historike të këtij qyteti e vendi, që mundohet të shfrytëzojë çdo situatë për kapital politik.
