Byroja e Kuvendit përjashtoi për pesë ditë nga seancat parlamentare, deputetin socialist Erjon Braçe dhe ata demokratë Edi Paloka dhe Roland Keta. Ndërsa për ish-Kryeministrin Sali Berisha Byroja është mjaftuar vetëm me vërejtje. Vendimi i Byrosë ka të bëjë me sherrin e ditës së enjte në seancën plenare, ku Erjon Braçe dhe ish-kryeministri Berisha u përballën me akuza e fyerje mes tyre. Për vendimin e Byrosë Erjon Braçe tha se ishte i pakënaqur edhe për faktin se Berisha u përjashtua nga ndëshkimi.
“Nuk kam ndërmend të toleroj këdo që do artikulojë fyerje ndaj meje. Kryetari i Kuvendit duhet të marrë përgjegjësitë dhe të administrojë seancën e Kuvendit, është e thjeshtë fare. U sulmova nga njerëz që nuk ishin fare në sallë, ishin në klubin e parlamentit apo klubet rreth e qark parlamentit. Kuptoni vetë tani, fizikisht jam sulmuar nga dy njerëz që nuk ishin fare në sallë dhe kur ju drejtova dhe i pyeta: A e dëgjuat se çfarë tha ai? Çrëndësi ka-tha kryetari i grupit parlamentar të PD, ta durosh. Kë të duroj? Kam 20 vjet që duroj të njëjtin fjalor jo vetëm unë por edhe shqiptarët, nga ajo sallë nuk ka mbetur shqiptar familjarisht i papërgojuar apo i papërfolur nga ky njeri.Po çfarë duhet të bëj?”, tha Braçe.
