Një varkë e vogël peshkimi në Durrës, pranë plazhit të Currilave, është përmbysur në det dhe dyshohet se brenda ndodheshin dy persona.
Një nga personat që ndodheshin në varkë, Ilir Bardheti 40-vjeç, ka mundur të dalë në breg, dhe është transportuar në drejtim të spitalit të Durrësit.
Personi tjetër, Ardian Mërkuri i moshës 52-vjeçare, ende nuk është mundur të gjendet.
Policia ndodhet në vendngjarje, ndërkohë që kanë nisur kërkimet për të gjetur personin e zhdukur.
Njoftimi i policisë për ngjarjen:
Më datë 01.03.2020, rreth orës 12:25, në lagjen nr.1, Durrës, dy shtetas ishin futur në det me një pedalon për peshkim, ku si pasojë e dallëgëve pedaloni është përmbysur.
Menjëherë pas njoftimit të marrë shërbimet e Policisë Kufitare dhe ato të DVP Durrës kanë dalë në det me mjet lundrues dhe në bashkëpunim me një prej familjarëve është bërë e mundur nxjerrja në breg e shtetasit I.B, rreth 48 vjeç, i cili ndodhet në spital nën kujdesin e mjekëve, ndërsa personi tjetër shtetasi A.M, rreth 52 vjeç, dyshohet se është mbytur.
Shërbimet e Policisë vijojnë kërkimet me mjete lundruese si dhe janë nisur polumbarët e Reneas për të bërë të mundur gjetjen e tij.
