“Faktikisht i kemi pasur varrezat në një kodër tjetër, por ka që nga viti ’90 nuk na le njeri me varros atje, se i kanë dalë pronarët”, thonë banorët e Zall – Shoshaj.
Personi që e zaptoi këtë tokë dhe që e shpalli veten pronar, ka arritur në reagime ekstreme kundër bashkëfshatarëve të tij. Disa herë duke përdor edhe armët.
“Kur ndërroi jetë vjehrri im, e çuam për ta varrosur, por pronari i tokës filloi të gjuante me automatik. Njerëzit ranë në gropën e varrit për t’i shpëtuar plumbave”, tha Shpresa Murra, banore Zall – Shoshaj.
Më e hidhur akoma ka qenë historia e një vajze të re, e cila ndërroi jetë dhe qëndroi për 3 ditë e pavarrosur.
“Biles fshati jonë bllokoi rrugën, vdiq një gocë e re dhe ne bllokuam rrugën për këtë problem, sepse nuk na lejonte i zoti i varreve të varrosnim gocën”, thotë një tjetër banor.
Askush nuk e shpjegon dot arsyen se përse ky njeri e ka zaptuar këtë copë toke që ka qenë varreza. Siç e shikoni ajo nuk shërben as për t’u mbjellë dhe as për të ndërtuar. Është thjeshtë një breg i vogël me shkurrë buzë një përroi të thellë.
Të zënë ngushtë, banorët kanë gjetur një zgjidhje tjetër. Ata i kryejnë varrimet në qytetin e Burrelit, afro 3 kilometra larg. Atje janë të detyruar të paguajnë shumë më tepër lekë si për shërbimet, ashtu edhe për varrin.
“Si të vdesin njerëzit, i varrosim në Burrel tek varrezat e përgjithshme”, “Për të varrosur në Burrel, duhet një shumë e konsiderueshme parash që ne nuk e përballojmë dot”, thonë banorët.
Kyetari i bashkisë së Burrelit thotë për Top Story se për momentin banorët e këtij fshati janë të lirë të varrosin të afërmit e tyre në qytet. Por, kjo nuk është zgjidhje përfundimtare.
“Subjekti konkret është dhe shërbim funerali, pjesa e tokës është falas nga ana e Bashkisë. Subjekti do paguaje shërbimet funerale si stolat, nevojat që mund të kenë, hapja e varrit etj”, tha Nazir Rizvani, Kryetar Bashkie, Burrel.
