Federata e Futbollit e Anglisë dhe Premierliga janë duke shqyrtuar mundësinë e zhvillimit të ndeshjeve pa tifozë gjatë këtij sezoni, në mënyrë që të kontrollohet përhapja e koronavirusit.
Që të dyja organizatat do të takohen me këshilltarë të qeverisë britanike për shëndetin publik para se të bëjnë ndonjë ndryshim në axhendën e ndeshjeve.
Megjithatë, tashmë këto dy autoritete të futbollit kanë mbajtur bisedime për t’i diskutuar masat që duhet të ndërmerren nëse qeveria i ndalon eventet e mëdha sportive. Zhvillimi i ndeshjeve pa praninë e tifozëve është përmendur si një opsion.
Anulimi i ndeshjeve mund të rezultojë në humbje multi-milionëshe, kështu që bisedimet janë përqendruar te mundësia e zhvillimit të ndeshjeve pa tifozë në stadiume, që do të ishte edhe opsioni i preferuar nga televizionet që kanë paguar për transmetimin e atyre ndeshjeve.
“Jemi në kontakt me autoritetet, ne jemi në duart e autoriteteve lokale dhe do të përballemi me çfarëdo që na thonë ata. Nuk ka rrezik për ndeshje të tjera me aq sa dimë tani, përveç atyre që tashmë janë bërë publike”, ka thënë një zëdhënës i UEFA-s.
UEFA e diskutoi vetëm shkurtimisht koronavirusin në takimin e Komitetit Ekzekutiv të së hënës në Amsterdam, përkundër rrezikut që ky virus përbën për zhvillimin e Kampionatit Evropian këtë verë dhe për ligat vendore.
