Banorët e “5 Majit” dhe të Paskuqanit kanë përfunduar takimin e tyre me presidentin Ilir Meta. Pas takimit, banorët u shprehën se Meta ka dëgjuar shqetësimet e tyre, ndërsa paralajmërojnë se mund të shkojnë drejt një greve urie.
Një prej banorëve u shpreh se askush nuk është kundër zhvillimit, por të jepen fillimisht paratë e dëmshpërblimit, ndërsa njoftuan se për momentin do vijojnë protestat.
“Presidenti ishte gati të na priste, shqetësimi ynë është prona. Ia adresuam kaosin dhe na tha do konsultohem me juristët e do shohim se çfarë mund të bëj. Shpresoj që të ketë zgjidhje ligjore. E njëjta gjë do të ndodhë edhe në Paskuqan. Skenarin e 5 majit do ta shohim kudo ku ka një projekt. Kjo është kërkesa jonë që të merret një zgjidhje para se të vijnë fadromat. Variant nga ne? Në kushtet që jemi sot Bashkia ka nisur shembjen pa dhënë një zgjidhje. Të dëmshpërblen banorët dhe t’u jepet afat që të çmontojnë banesat, por pa u dhënë paratë mos të ndërmarrin asnjë vendim. Do vazhdojmë protestat. Ka pasur një ultimatum për grevë urie. Do vijë. Janë gurët e fundit që po i lëvizim për të marrë një zgjidhje. Në momentin që do marrim një zgjidhje nuk do të ketë grevë urie”, tha një nga banorët.
