Mbrëmjen e sotme, Shqipëria do të luajë ndeshjen përballë Izraelit, për kualifikueset e Botërorit “Rusi 2018”.
Ndryshe nga ndeshja miqësore me Luksemburgun, Gianni De Biasi i është kthyer skemës besnike të tij 4-1-4-1.
Në portë do të jetë Thomas Strakosha, ndërkohë në repartin e mbrojtjes, i vetmi ndryshim është aktivizimi i Alijit në vend të Agollit, në krahun e majtë, e pjesa tjetër është e njëjta me Hysaj, Gjimshiti dhe Mavraj.
Përpara mbrotjes do të luajë Burim Kukeli, ndërkohë që katërshja e mesfushës përbëhet nga Roshi dhe Hyka në krahë, më pas Abrashi dhe Memushaj në qendër.
Në sulm do të jetë Armando Sadiku, i cili mbetet më i preferuar për trajnerin italian sesa Sokol Cikalleshi, pavarësisht formës shumë të mirë që ky i fundit po kalon në kampionati turk.
Aktualisht Shqiperia është në kuotën e 6 pikëve, në vendin e katërt në grup, 3 më pak sesa Izraeli i vendit të tretë.
