Qeveria greke synon të lehtësojë kushtet për emigrantët shqiptarë, të cilët jetojnë e punojnë prej thuajse tri dekadash atje, për të përfituar pension. Për këtë çështje ka publikuar së fundmi një draft ligjor për të treguar se si do të procedohet. Drafti ligjor parashikon që të ulet pragu për të marrë pension të plotë, nga 40 vite, që është aktualisht, në 30 vite. Por pavarësisht kësaj iniciative, nuk ka ende një hap konkret për unifikimin e viteve të punës për efekt pensioni me palën shqiptare.
Nga ana tjetër, përfaqësuesit e emigrantëve kërkuan një pension të plotë kombëtar ku kriteri i viteve të ulej në 20 vite të qëndrimit të ligjshëm në Greqi, dhe jo 30, saç është përcaktuar në projektligj. SYRIZA ka kërkuar pagesën e pensionit kombëtar për emigrantët nga Shqipëria dhe ish-Bashkimit Sovjetik që kanë 15 vite qëndrim të përhershëm dhe dhënien e një pagese të plotë për të moshuarit emigrantë të pasiguruar nga Shqipëria.
“Qeveria, pavarësisht premtimeve, me nenin 60 të projektligjit të Ministrisë së Brendshme, parashikon se do të kërkohen 30 vjet qëndrim që emigrantët nga Shqipëria dhe vendet e ishBashkimit Sovjetik të marrin pension të plotë. Kjo është një marrëveshje joadekuate që erdhi shumë vonë. Gjithashtu, qeveria Mitsotakis është përgjegjëse, sepse nuk zbaton për 32 muaj dispozitën e qeverisë SYRIZA të vitit 2019, e cila parashikon kthimin e plotë të kompensimit për të moshuarit emigrantë të pasiguruar nga Shqipëria”, thanë deputetët Mariliza Xenogiannakopoulou dhe Kosdas Zodrias.
