Ish-kryeministri Sali Berisha ka ndryshuar versionin për heqjen e embargos së naftës ndaj Serbisë, duke thënë se ky vendim penalizonte Kosovën dhe shumë pak Beogradin.
Berisha u shpreh në RTK Prime se ai ndërmori atë veprim duke hequr embargon e vendosur nga ndërkombëtarët ndaj Sllobodan Millosheviçit, që t’i jepte mundësi Kosovës që të punonte tokat e saj. Kjo deklaratë e Berishës bie në kundërshtim me versionin që ai ka dhënë kohë më parë në një interviste televizive, ku ka thënë se nuk mund ta linte Kosovën pa ngrohje.
“E vërteta është që qeveria shqiptare e Berishës ishte e vetmja që kërkonte heqjen e embargos sepse penalizonte Kosovën dhe pothuajse fare Beogradin. Naftën e kontrollonte Beogradin. Naftën e merrte nga Danubi. Në Kosovë 40-50% e tokës mbeti djerr. Nuk e punonin më. Sepse shkoi çmimi i punimit më i lartë se fitimi nga prodhimet. Të gjithë krizën e naftës e përjetonte Kosova. Nuk desha që kjo krizë e naftës të binte mbi Kosovën. Kosova kishte tokë pjellore. Unë kërkoja publikisht heqjen e Embargos. Raportet e OKB tregojnë se 96% të naftës Serbia e merrte nga Danubi. Për të zbatuar ligjin ndërkombëtar Sali Berisha ka bërë gjithçka. A kishte shkelje, natyrisht që po. Zonat kufitare tregtonin naftë me mushka dhe gomarë. A mund të urdhëroja unë zonat kufitare të vrisnin një person për një bidon naftë. Nuk mund të pranoj unë që të qëllohet për një bidon naftë. Nuk ka qenë vetëm këto. Nëse shkelje e embargos quhet transportimi i naftës me mushka dhe gomarë, ky është slogan i enveristëve, deklaroi Berisha.
Ndonëse Berisha sot trumbeton me të madhe mbështetjen për Kosovën, veprimet e tij kanë treguar të kundërtën, sidomos kur flitet për heqjen e embargos ndaj Serbisë, “turp” ky që do ta shoqërojë Berishën në të gjithë karrierën e tij politike.
Ai shkeli embargon e OKB-së në lidhje me furnizimin e Serbisë me karburante, municion e armë, në vitet kur ky shtet ushtronte gjenocid barabar kundër popullit shqiptar të Kosovës.
