Kryeministri Edi Rama ka bërë dhe njëherë të qartë qëndrimin e tij për rritjen e pagës së pedagogëve, pasi këta të fundit paralajmëruan protestë masive. Ndërkohë që këtë të enjte Sindikata e Pedagogëve ka thirrur një protestë kombëtare në Tiranë, Rama ka dalë me një mesazh në Twitter.
Lidhur me kërkesat e pedagogëve për rritje page, Rama ka deklaruar se nuk do të kenë rritje rroge, ndërsa akuzoi opozitën dhe mediat se kanë tjetërsuar deklaratat e tij për kontrollin e pasurisë së tyre.
Postimi në Twitter:
Mediat e angazhuara masivisht për ta paraqitur si masive protestën e një pakice pedagogësh, nën udhëheqjen e nongratave e të shiksave të tyre, flasin për gjoja një Vetting që do bëka regjimi imagjinar për pedagogët! Asnjë Vetting as do bëhet, as është thënë e as është e menduar!
Sa për rritjen e mëtejshme të pagave e përsëris, nuk do të ndodhë deri kur të vijë radha e natyrshme, pas pensionistëve në fundvit dhe pas daljes dimri, kur do të bëjmë bilancet e kostove të mburojës së energjisë elektrike, edhe për familjet e pedagogëve që mbrohen nga qeveria!
