“Autoritetet shtetërore greke po rrëfejnë mosrespekt të thellë për të drejtat e njeriut, po na shfaqen me nota primitiviteti dhe atavizmi edhe përballë respektimit të shtetasve të vet”
Partia Drejtësi, Integrim dhe Unitet PDIU ka reaguar për deklaratat e zyrtarëve grekë të cilët kanë kërkuar dënimin me burg për rekrutët shqiptarë në ushtrinë greke. Është fjala për disa të rinj shqiptarë në ushtrinë greke që janë shfaqur në fotografi me simbolin e shqiponjës. PDIU i bën thirrje qeverisë shqiptare të njoftojë partnerët tanë në NATO mbi shkeljet e vazhdueshme që shteti grek bën ndaj bashkëkombasve tanë duke nisur nga shkelja e hapur dhe e vazhdueshme e të drejtave të njeriut ndaj shqiptarëve të Çamërisë. PDIU kërkon gjithashtu që të bëhen me dije këto veprime në dhunim të drejtave të njeriut në instancat e Këshillit të Europës, OSBE, BE dhe OKB, ku respektimi i të drejtave të njeriut dhe minoriteteve ka një rëndësi primare.
Përmes një deklarate për mediat, PDIU ka dënuar me ashpërsi reagimin absurd të qeverisë greke ndaj rekrutëve shqiptarë. “Ky reagim vërteton se Greqia është ende e ngërthyer në nacionalizmin e shekullit të shkuar, duke mos pranuar identitetin ndryshe të shtetasve të saj. Është e njëjta gjë sikur Shqipëria të mos pranonte në ushtri asnjë minoritar, e për më tepër të mendojë që këta shtetas do mund të ishin deputetë, kryetarë bashkie apo ministra që në Shqipëri i gjen shpesh.
Kujtojmë që në raste skandaloze, si parada zyrtare e ushtrisë greke, ku këndoheshin këngë që thërrisnin për vrasjen e shqiptarëve, qeveria greke nuk ndërmori të njëjtat veprime. Autoritetet shtetërore greke po rrëfejnë mosrespekt të thellë për të drejtat e njeriut, po na shfaqen me nota primitiviteti dhe atavizmi edhe përballë respektimit të shtetasve të vet.
Greqia është i vetmi vend europian që nuk njeh minoritetet dhe nuk pranon se një shtetas grek mund të ketë kombësi apo besim fetar të ndryshëm. Krimi i ushtruar ndaj shqiptarëve të çamërisë tregon për një mentalitet që zë fill vite të shkuara e që vazhdon edhe sot”, theksohet në deklaratëne PDIU-së.
