Partia Drejtësi Integrim dhe Unitet deklaron se Presidenti i Maqedonisë i është kthyer shovinizmit të para viteve ‘90, i cili solli në Ballkan gjithë ato luftra dhe pështjellime.
Më poshtë deklarata e plotë e PDIU-së:
Qëndrimet dhe deklaratat e urrejtjes ndaj shqiptarëve të Presidentit maqedonas Ivanov janë të papranueshme dhe të kujtojnë shovinizmin sllav të fillimit të viteve ‘90-të. Po ashtu, vendimi i tij për të mos ia dhënë mandatin koalicionit që ka shumicën parlamentare është një goditje e rëndë që i bëhet demokracisë në këtë vend, si dhe një kërcënim ndaj stabilitetit të mbarë rajonit. Ne i bëjmë thirrje të gjithë aktorëve dhe faktorëve politikë shqiptarë, kudo që ndodhen, që të bashkohen dhe të reagojnë në mënyrë të koordinuar kundër këtij manifestimi të racizmit dhe autoritarizmit në Maqedoni. Po ashtu, i bëjmë thirrje faktorit ndërkombëtar që të angazhohet seriozisht për të mbrojtur institucionet e demokracisë dhe të drejtat shtet-formuese të shqiptarëve në këtë shtet.
