Kreu i Departamentit të Sigurisë në PD, Enkelejd Alibeaj deklaron se Rama dhe Tahiri po mbajnë të fshehura fakte tronditëse në lidhje me grabitjen dhe që sipas tij, dëshmojnë implikimin e shefave të rëndësishëm të ministrit në këtë histori. Partia Demokratike i bën thirrje Prokurorisë të hetojë me intensitet të gjithë rrethanat e dyshimta e të nxjerrë përgjegjësitë.
Alibeaj: Fakte të pakundërshtueshme tregojnë se Policia është njoftuar nga autoritetet e Aeroportit brenda 1 minute, pra sapo ngjarja ka ndodhur, por përgjigja ka qenë se Furgoni i Policisë ndodhet në pistë për të pritur dhe shoqëruar persona të deportuar. Edhe pse një furgon i grupit të gatshëm gjendej aty i dislokuar, pas sulmeve të Stambollit, Policia ka arritur në vendngjarje vetëm pas 30 minutash. Dy akset e vetme nga mund të ikin grabitësit, ai nga Rinasi në Tiranë dhe Rinas-Fushë Krujë, nuk u bllokuan nga Policia në kohën e duhur.
Sipas Alibeajt, qeveria po tenton të zvogëlojë përmasat e grabitjes.
Alibeaj: Qeveria, Rama-Tahiri, po tentojnë të servirin të dhëna të genjeshtërta për shumën e grabitur, duke u përpjekur të zvogëlojnë përmasat e grabitjes me armë e me maska në pistën e avionave, ndërsa e vërteta është se bëhet fjalë për disa milionë euro. Burime serioze pranë bankave të nivelit të dytë flasin për një shumë rreth 10 milionë euro. Të gjitha këto rrethana tregojnë dhe një herë fuqinë që ka marrë krimi me Ramën e Tahirin, dhe dëshmojnë inkriminim të pikave kyçe të policisë.
