Ish kryeministri Sali Berisha ka marrë pjesë në konferencën e organizuar në kuadër të zgjedhjeve vendore paraditen e sotme, ku pranoi se PD ka kaluar nëpër një proces, të cilin e cilësoi më të vështirin ndër vite.
Berisha tregoi se ishte para dilemës nëse duhet ta linte partinë “të ekzistonte apo të shkrihej”, dhe sipas tij, ajo duhet të ekzistonte sepse mbi 620 mijë shqiptarë e votuan në zgjedhjet e fundit.
“Partia Demokratike ndodhet në momentin e saj më të vështirë që mund të përshkruhet. Ne jemi në mandatin e tretë në opozitë dhe kjo absolutisht jo për merita të qeverisë por për dobësinë e opozitës. Sepse ne këtu, kemi pasur dhe kemi një qeveri e cila mund të përmblidhet me dy fjalë “qeveri e bazuar në skandale”. Ky udhëtim i opozitës në këto vite, ka qenë një udhëtim topitës në një mënyrë ose në një tjetër për fatin më të keq si asnjëherë në këto 30 vite, dora e qeverisë u shtri mbi opozitën. Tek shqiptarët u krijua përshtypja se Edi Rama është i pamundshëm dhe se opozita i bën fresk atij. Në këtë kontekst, partia Demokratike ndodhej para alternativës “të ekzistonte apo të shkrihej”. Por unë mendoj se ajo duhet të ekzistonte sepse mbi 620 mijë shqiptarë, e votuan në zgjedhjet e fundit, por që ajo të ekzistonte duhet të ndryshonte në mënyrë rrënjësore, të paraqitej para shqiptarëve si një parti tërësisht e ndryshuar, përndryshe ata nuk kanë asnjë arsye të na besojnë. Në një vit me përpjekje të jashtëzakonshme, ne ia kemi dalë, kemi shënuar arritje substanciale për t’u paraqitur si parti e ndryshuar para shqiptarëve”, u shpreh Berisha.
