Kuvendi i Shqipërisë ka nisur me debate ditën e sotme lidhur me kohën e diskutimeve të deputetëve. Teksa ishin mbledhur për të diskutuar ngritjen e tre komisioneve hetimore të kërkuara nga opozita, por këta të fundit kanë kërkuar ndryshimin e vendimit të marrë në Konferencën e Kryetarëve lidhur me kohën e diskutimit 360 minuta.
I pari që kërkoi ndryshim të vendimit të Konferencës së Kryetarëve ishte nënkryetari i PD-së, Alfred Rushaj, i cili tha se në këtë seanca po shkelet rregullorja.
Të njëjtën gjë tha edhe deputeti i PD-së, Gazmend Bardhi, i cili pohoi se kryetarja e Kuvendit po i heq të drejtën e fjalës opozitës.
“Mos na mohoni të drejtën e fjalës. Kjo s’ka ndodhur kurrë që deputetëve të opozitës, 63 deputetë, që të flasin 100 minuta. Ndërkohë rregullorja na ka dhënë të drejtën që të flasim 600 minuta. Ju tani duhet të ndërprisni seancën?! Opozitës nuk mund t’i mbyllet goja në një parlament që ekziston në një vend minimumi normal. Ju keni detyrimin që të thoni se kush është arsyeja që keni marrë këtë vendim. Doni t’i hiqni të drejtën e fjalës opozitës? Jeni aty jo thjesht për t’u bërë transmetuese e vendimeve. Jua ka kërkuar Edi Rama? Nuk është argument!”
Nikolla: Është marrë me vendimmarrje të përbashkët në Konferencën e Kryetarëve.
Bardhi: Kush ju ka thënë ju kryetare se po të flasin deputetët e opozitës të zë covid-i?! Dhe të jesh mbi 20 mijë veta në stadium nuk të zë virusi.
Në seancën e sotme, Partia Socialiste ka deklaruar se do të miratojë ngritjen e komisionit hetimor për kontrollin e keqpërdorimit të burimeve të administratës shtetërore, si dhe të asgjësimit të kufirit midis shtetit dhe Partisë Socialiste në pushtet për qëllime elektorale në zgjedhjet e 25 prillit 2021. Mazhoranca ka shfaqur qëndrimin kundër ngritjes se komisionit tjetër hetimor lidhur me çështjen “Bechetti” dhe kjo pritet që të sjellë përplasje të forta gjatë ditës së sotme.
