Kreu i grupit parlamnetar demokrat i shkruan kryetarit të Kuvendit Ilir Meta, kërkon zgjatjen e afatit për kryerjen e këtij hetimi
Grupi Parlamentar i Partisë Demokratike ka kërkuar nga kryetari i Kuvendit Ilir Meta zgjatjen e afatit të Komsionit Hetimor: “Për të kontrolluar zbatimin e legjislacionit në fuqi për administrimin e bazave të të dhënave shtetërore tatimore”. Përmes një letre dërguar kryetarit të kuvendit, Partia Demokratike theksohet se komisioni hetimor i ngritur dhe i përfunduar më datë 22 janar 2016, nuk kishte nxjerr konkluzionet e plota te hetimit. Një tjetër pretendim i PD-së lidhet me përcaktimin e afatit të veprimtarisë së Komisionit që sipas opozitës është e drejtë ekskluzive e kërkuesit.
Në pikën e tretë, grupi parlamentar i PD-së thekson se nuk nuk ka asnjë përcaktim në ligj dhe në Rregulloren e Kuvendit që të specifikojë procedurën e shtyrjes së afatit të veprimtarisë së Komisioneve Hetimore. Partia Demokratike refuzon propozimin e shumicës për ngritjen nga e para të këtij Komisioni Hetimor, pasi kjo praktikë është e rrezikshme për rezultatet e vetë hetimit, dhe se sipas PD-së, sjell vonesa të panevojshme që mund të dëmtojnë vetë përfundimet e hetimit, si dhe i shkakton dëm financiar Buxhetit të Shtetit.
Opozita parlamentare ka paralajmëruar se në seancën parlamentare të 11 shkurtit nuk do të lejojë të diskutohet asnjë çështje tjetër pa u miratuar më parë me konsensus zgjatja e afatit të veprimtarisë së Komisionit Hetimor “Për të kontrolluar zbatimin e legjislacionit në fuqi për administrimin e bazave të të dhënave shtetërore tatimore”.
