Deputetja demokrate Arbiola Halimi tha se kompania e themeluar nga Ilir Beqa, ka marrë parët dhe nuk ka ofruar shërbimin
Partia Demokratike e akuzoi ministrin e shëndetësisë, Ilir Beqja, se i ka dhënë firmës së tij INTECH plus, 85 milionë lekë, për instalimin e një programi tek Fondi i Detyrueshëm i Sigurimeve Shëndetësore.
Deputetja e PD-së Arbiola Halimi tha se kompania e themeluar nga Ilir Beqa, ishte ofertuesi i vetëm për këtë shërbim dhe se në krye të bordit të kësaj kompanie është vetë ministri Ilir Beqa.
Halimi tha se megjithse kompania ka marrë paratë nga buxheti i shtetit ende nuk ka ofruar shërbimin. “Sipas burimeve zyrtare, edhe pse në këtë rast Beqa, i dha me firmën e tij, 85 milionë lekë firmës së tij, Intech plus, shërbimi as nuk është ofruar. Sistemi i kontabilitetit Oracle, për të cilën Beqa i dha Beqës 85 milionë lekë, nuk funksionon. Vjedhje e hapur, paratë janë dhënë, puna nuk është bërë. Me gjithë këto rekorde skandaloze korrupsioni, Ilir Beqa vazhdon të fitojë zemrën e Edi Ramës i cili e ka caktuar së fundmi dhe kordinator për matjen e punës së qeverisë”, tha deputetja demokrate.
