Deputeti i opozitës, Astrit Patozi nuk pranoi analogji mes protestës së opozitës në 2009 dhe protestës së opozitës sot, duke theksuar se ndryshojnë në formë dhe në përmbajtje.
I ftuar në Top Story, Patozi i quan të pakuptimta lidhjen e protestës së opozitës me çështje të tjera të realitetit shqiptar, njëra prej të cilave është edhe reforma në drejtësi dhe procesi i Vettingut.
“Gjithçka tjetër që thuhet për protestën nuk ka kuptim. Shqiptarët kanë mijëra arsye për të protestuar sot, por zgjedhjet e lira dhe të ndershme janë kryesore”, tha deputeti demokrat.
Sipas tij, protesta synon shmangien e vjedhjes së zgjedhjeve, e cila do ta fuste vendin në kriza ciklike.
Deputeti demokrat u shpreh se qeveria ka shkelur të gjitha kontratat dhe nuk jep asnjë garanci për zgjedhje të lira dhe të ndershme. Në këtë situatë, ai sheh vetëm një zgjidhje, qeverinë teknike.
