Në ditën e dytë të aksionit masiv, organizuar nga MTM, në bashkëpunim me shkollat, forcat e armatosura, e qindra vullnetarë të FRESSH Green, u mundësua pastrimi i aksit kryesor nga Rinasi në hyrje të qytetit të Krujës.
Ministri Klosi deklaroi se aksionet do të vazhdojnë, por do të ketë masa ligjore dhe forcim të rregullave për të disiplinuar raportin e qytetarëve dhe biznesit me mjedisin.
“Kemi shumë nevojë jo vetëm për të bërë aksione por do të duhet të bëjmë një politikë shumë të fortë për sa i përket mjedisit, do të duhet të shikojmë rregullat me të cilat trajtohet mjedisi në Shqipëri dhe këto aksione dëshmuan sesa shumë ne kemi nevojë të ndryshojmë të gjithë filozofinë tonë për Shqipërinë e pastër. Shqipëria që ne duam është Shqipëria e pastër por kjo nuk mjafton që të thuhet vetëm në një ditë aksioni, por duhet thënë çdo ditë ku ne jetojmë. Nuk mund të hedhin mbetjet në shesh, nuk mund t’i hedhin jashtë territorit të tyre. Unë e di shumë mirë që janë të pastër brenda dhe sapo del nga shtëpia jashtë situata është realisht për t’u riparë”, u shpreh ministri Klosi.
Klosi së bashku me 300 të rinj vullnetarë, nxënës të shkollave të mesme të Fushë- Krujës dhe Krujës, dhe të rinj të FRESSH, punuan për pastrimin dhe më pas mbjelljen me pemë të aksit kryesor nga Rinasi deri në hyrje të qytetit të Krujës.
