Me siguri përmes fotove të fundit të Ledri Vulës, keni parë dorën e tij. Nëse me vete keni pyetur “çfarë i ka ndodhur lëkurës së tij”, përgjigja është: Vitiligo.
Pasi partnerja e tij, Sara Hoxha, e riktheu në vëmendje, tani reperi ka dashur vet të japë një mesazh të rëndësishëm lidhur me sëmundjen e tij të lëkurës.
Ai ka publikuar një foto të dorës së tij duke nxjerrë në pah shenjat teksa ka shkruar: “Buzëqesh”. Reperi, i cili ka një numër të madh ndjekësish të rinj, nuk e ka fshehur ndonjëherë sëmundjen e tij duke shërbyer si një shembull edhe për të tjerët që mund të kenë të njëjtin ‘problem’.
Për ata që nuk e dinë Vitiligo-është një lloj sëmundjeje që shkakton humbjen e pjesshme të ngjyrës së lëkurës. Pjesët që humbasin ngjyrën e trupit përgjithësisht zmadhohen me kalimin e kohës. Ky çrregullim mund të shfaqet në çdo zonë të trupit, përfshi këtu edhe në flokë apo brenda gojës.
Në gjendje normale, ngjyra e flokëve dhe e lëkurës përcaktohet nga melanina. Vitiligo ndodh kur qelizat që prodhojnë melaninën vdesin ose ndalojnë së funksionuari.
Vitiligo mund të prekë njerëzit e çfarëdo lloji lëkure, por është më e dukshme tek ata me ngjyrë lëkure gruri ose të zezë. Sëmundja nuk është serioze për jetën dhe as ngjitëse, por në një moment a një tjetër mund të bëhet stresuese për personin.
Vitiligo shpesh shoqërohet me disa sëmundje autoimune: më së shpeshti me sëmundjen e gjëndrave tiroide në 30% të rasteve, sëmundjen e sheqerit, aneminë pernicioze, lupus erythematosusin, sklerozën sistemore, etj.
Kjo sëmundja nuk dhemb, nuk shkakton kurrfarë vështirësie, pos që i sëmuri për shkak të saj mund të vuajë psikisht, mund të tërhiqet në vetvete dhe t’i shmanget shoqërisë.
