Vetëm tre ditë pas zjarrit të vënë qëllimisht, është shpronësuar godina e shpallur monument kultur, e Sarajeve të Toptanëve në Tiranë.
Kjo godinë tashmë i ka kaluar bashkisë së Tiranës, ndërsa vendimi është botuar edhe në fletoren zyrtare.
Sipas vendimit, pronarët do të marrin një vlerë monetare prej 178 694 456 (njëqind e shtatëdhjetë e tetë milionë e gjashtëqind e nëntëdhjetë e katër mijë e katërqind e pesëdhjetë e gjashtë) lekë.
Mësohet se është shpronësuar edhe Muzeu Etnografik i Tiranës, “Sarajet e Libohovitëve”. Për këtë godinë vlera totale paraprake e shpronësimit është 505 843 802.6 (pesëqind e pesë milionë e tetëqind e dyzet e tre mijë e tetëqind e dy pikë gjashtë) lekë.
Kujtojmë se godina shekullore e Sarajeve tre ditë më parë u sulmua me zjarr nga dy persona ende pa identifikuar. Pas verifikimit të kamerave të sigurisë hetuesit kanë mundur të identifikojnë 2 autorët, por për shkak të hetimit nuk bëhet ende me dije identiteti i tyre. Policia bën me dije se autorët janë shpallur në kërkim dhe po punohet për kapjen e tyre.
