Ambasadori amerikan Donald Lu ka vijuar edhe sot takimet në kërkim të gjetjes së konsensusit për reformën në drejtësi.
Lu është takuar gjatë paradites me kreun e Komisionit të Posaçëm për Reformën, Fatmir Xhafaj. Diskutimet u shvilluan në Kryesinë e Kuvendit.
Një ditë më parë Lu dhe Vlahutin njohën kreun e Kuvendit Ilir Meta me propozimin që solli në Tiranë nga Uashingtoni si formulë konsensusi, ndihmës sekretarja e Shtetit, Victoria Nuland. Meta nënvizoi nevojën për konsensus.
Meta: Do të bëjmë gjithçka që kjo reformë të miratohet me konsensus dhe mbi të gjitha t’i japë një imazh pozitiv vendit tonë si një vend i ndërgjegjshëm për problematikën që ka por edhe me vullnetin për t’i rritur ndjeshëm dhe me ambicie të vendosur standardet e funksionimit të shtetit ligjor.
Ndërsa shefi i Qeverisë, Edi Rama i kërkoi Partisë Demokratike të enjten që të shkruajë si të dojë reformën në drejtësi dhe mazhoranca do ta miratojë me kusht që të marrë miratimin e Shteteve të Bashkuara dhe të Bashkimit Evropian.
Ndërkohë që kanë mbetur edhe pak ditë nga afati përfundimtar për miratimin e kësaj reforme që është 21 korriku.
