Qeveria ka zbardhur e publikuar në Fletoren Zyrtare edhe kontratën me kompaninë ‘Jones Group International’, pas miratimit të ligjit special për sigurinë kibernetike në fillim të prillit. Kompania amerikane është e specializuar në fushën e mbrojtjes kibernetike që do të ketë akses thuajse në të gjitha sistemet digjitale të vendit do të bëjë një vlerësim të sistemeve të sigurisë, do hartojë një planveprim për çdo institucion dhe do të mbikëqyrë në krijimin, zhvillimin, zbatimin dhe funksionimin e Qendrës Shqiptare të Operacioneve të Sigurisë Kibernetike.
Procedura e negocimit të kontratës do të menaxhohet nga Agjencia Kombëtare e Shoqërisë së Informacionit, bashkë me një komision të posaçëm prej shtatë përfaqësuesve të Ministrive të Infrastrukturës, Mbrojtjes, Rendit, Financave, Avokaturës së Shtetit, Autoritetit për sigurinë Kibernetike dhe Drejtoria e Sigurimit te Informacionit te Klasifikuar. Lidhja e kontratës me Jones Grup u paralajmërua nga kryeministri Edi Rama, fill pas rrjedhjes masive të të dhënave personale në fundin e vitit të shkuar.
Kujtojmë se vendimin për t’ia dhënë të dhënat personale një kompanie private, qeveria e mori pas skandalit të pagave që doli para disa muajsh.
