Pas referendumit, protestuesit zbritën nëpër rrugë si pjesë e grevës së përgjithshme, si kundërpërgjigje ndaj asaj që e konsiderojnë shkelje flagrante të lirive dhe të drejtave gjatë votimit të së dielës.
Protestuesit kanë bllokuar të paktën 24 rrugë në mbarë Katalunjën, duke shkaktuar ngërçe të mëdha të trafikut. Greva, që ka bërë të mbyllen për një ditë transporti publik, shkollat dhe klinikat e Katalunjës, është reagim ndaj dhunës së të dielës.
Edhe pse Madridi zyrtar e bëri të qartë në çdo mënyrë të mundshme, se referendumi ishte i paligjshëm, 2.2 milionë vetë hodhën votën e tyre e 90% i thanë “po” pavarësisë.
