Pas Elbasanit forcat speciale RENEA kanë zbarkuar në qytetin e Belshit dhe në Cërrik. Burime për gijotina.com bëjnë me dije se deri tani po merren në kontroll automjetet luksoze të dyshimta ku mund të jenë fshehur persona të shpallur në kërkim.
Pritet të zbardhen detaje në vijim, nëse nga aksioni do të ketë të arrestuar apo do të “dështojë”.
Aksioni vjen pas dy ngjarjeve të bujshme të ndodhur anë vend. Masakra e Fushë-Krujës ku u ekzekutuan 3 persona. Dhe atentati në Milot ku u vra një person dhe një tjetër u plagos rëndë. Dyshohet se të dyja ngjarjet kanë lidhje me njëra-tjetrën.
Ngjarjet shënuan 4 viktima dhe 1 të plagosur, duke theksuar kështu se bandat kriminale janë rikthyer fuqishëm dhe po fillojnë eliminimet nga të dyja palët. Pasditen e 17 korrikut, 4 persona të paidentifikuar ekzekutuan me breshëri kallashnikovi tre të rinj në mbikalimin e Fushë-Krujës. Viktima të atentatit mbetën Brilant Martinaj, që dyshohet se ishte dhe objektivi, Diklen Vata dhe Besmir Hoxha. Tre viktimat ishin duke udhëtuar me një mjet “Volkswagen Passat” nga Rinasi në drejtim të Laçit kur një makinë “Volkswagen Passat” i zuri pritë, 3 perona dolën nga mjeti dhe zbrazën breshërinë e kallashnikovit mbi ta. Nga breshëria e plumbave makina shpërtheu në flakë. Brilant Martinaj dhe Besmir Hoxha u shkrumbuan Brenda makinës që u dogj. Ndërsa Diklen Vata ishte pasagjer në pjesën e pasme, mundi t’i shpëtonte plumbave dhe tentoi të largohej duke dalë nga mjeti. Kur autorët e panë që doli gjallë, u kthyen dhe u siguruan që të vdiste.
Atentati në Milot, shënjestra Ylli Brahimi
Pak ditë pas masakrës me 3 të vrarë që tronditi Shqipërinë, krimi goditi sërish në Milot. Ylli Brahimi dhe Klisman Preçi u qëlluan me breshëri automatiku. Preçi nuk mundi t’i mbijetojë plagëve dhe mbërriti në spital pa shenja jete. Dy personat ishin duke qarkulluar me automjet në Milot dhe janë qëlluar me breshëri automatiku duke mos i lënë mundësinë Klismanit të shpëtonte. Ylli Brahimi dyshohet të jetë objektiv i atentatit.. Pas atentatit, një makinë e djegur u gjet në Borizanë. Dyshohet që makina e djegur të jetë përdorur nga autorët. Pas atentatit, dyshohet se autorët janë larguar drejt Laçit. Policia ka ngritur postblloqe. Kontrolle po kryhen edhe në Kurbin, pasi ka dyshime se autorët të jenë nga kjo zonë. Preçi dhe Brahimi janë emra të njohur për policinë. Ata i kanë shpëtuar atentateve edhe më parë. Brahimi ka qenë i përfshirë në biznesin e lojërave të fatit dhe i dënuar për trafik të lëndëve narkotike, ndërsa është marrë në pyetje dhe për vrasjen e ish-policit Xhelal Reçi. Ndërsa, Klisman Preçi është arrestuar për një tentativë grabitjeje me armë në Milot.
