“Me flamurin kombëtar” – është një dekoratë që njeh kontributin e jashtëzakonshëm të një personaliteti, sa i takon lartësimit të shtetit dhe kombit – me këtë motivimin, presidenti Bujar Nishani do të nderojë sot shkrimtarin Ismail Kadare. Ky është motivimi fillestar që u jepet personaliteteve shqiptarë e të huaj, mbi të cilin presidenca ka shtuar dhe një motivim tjetër për shkrimtarin e diktaturës: Kontribut të jashtëzakonshëm për nxjerrjen nga anonimati të letërsisë shqipe, çka e ka bërë që në vitet më të errëta e të izoluara gjatë diktaturës komuniste. Në thelb, ndonëse ky shkrimtar ka “konsumuar” pothuaj çmimet më të rëndësishme ndërkombëtare të letërsisë, mjaft afër Nobelit, në Shqipëri e nderojnë politikisht mbi një totem, identitar. Lajmin e ben te ditur gazeta Mapo sot.
Vlerësimi vjen nga një ngjarje: Në 80-vjetorin e lindjes së shkrimtarit. Ky është dhe vit i shpallur, si nismë fillestare nga bashkëvendësit e Kadaresë, Gjirokastra e vijuar më pas, dhe si produkt veprimtarish të Ministrisë së Kulturës, duke kulmuar me hapjen e shtëpisë muze të Kadaresë. Por në ditën e kësaj feste përuruese, ku mori pjesë gjithë politika, e krerë shtetesh, vetë shkrimtari e injoroi edhe pse shtëpinë e tij ia fali shtetit. Por nga ky rast, Kadare ka pranuar të jetë prezent, nesër në ceremoninë e dorëzimit që do të mbahet në Hotel International, Tirana, ku presidenti Nishani do të mbajë fjalën e rastit.
Presidenti Nishani më herët kishte bërë të ditur vendimin për dekorimin e shkrimtarit dhe refuzimin nga ana e tij të ftesës për të qenë prezent. “E vërteta është se i kam dërguar me shkrim një letër shkrimtarit, ku sugjeroja prezencën e tij në Tiranë për të marrë medaljen më të lartë që kemi “Urdhrin e Flamurit”, pikërisht në vitin e 80 të lindjes së tij. Por nuk kam pasur një përgjigje pozitive, duke e lënë këtë aktivitet të zhvillohet në një kohë të dytë”– tha Nishani ne muajin janar. /27.al
