Partizani-Tirana nuk ishte një derbi si gjithë të tjerat. Sfida e cila u luajt të enjten u bë më speciale pasi ishte përballja e 200-të mes rivalëve më të mëdhenj të futbollit shqiptar, mes sfidave të luajtura në të tre kompeticionet zyrtare. Jo rastësisht edhe organizatorët, për të ruajtur statusin e kësaj sfide e shtynë zhvillimin e saj, vetëm që të luhej në Arenën Komëbtare.
Që nga viti 2019 ndeshjet derbi janë të përhershme në këtë impiant duke u bërë një rekord shikueshmërie me dy klubet që vijojnë të fiksojnë të ardhura të mira. 198 ndeshje të luajtura në kampionat e Kupë me 79 fitore në favor të Partizanit, 61 barazime e 58 fitore për bardheblutë, që suksesi i fundit është i 2 tetorit i vitit 2022 në atë fitore 0-2 me dy golëshin e Xhixhës.
Nëse do të shohim gjithashtu edhe numrin e golave, dukshëm Partizani është më superior me 262 realizime në krahasim me 215 të Tiranës. Në Superkupë, dy skuadrat janë përballur dy herë, në vitin 1997-të, finalja nuk u zhvillua për shkak të luftës civile që zuri vendin tonë, ndërsa në vitin 2004, Partizani fitonte me rezultatin 2-0.
