Liliana Segre, italiania që i mbijetoi kampit famëkeq të Aushvicit ka folur në Parlamentin Europian, duke treguar historinë e saj, me të pranishmit që kanë shpërthyer në lot nga historia e dhimbshme.
Në fjalimin e saj, Segre tregoi përvojën si një vajzë e re që përballet me të këqijat e njerëzimit, ndërkohë që lëshoi edhe një mesazh të fuqishëm dashurie për jetën dhe për të luftuar racizmin dhe antisemitizmin.
“Jam jashtëzakonisht e emocionuar që jam këtu në Parlamentin Evropian,” tha ajo. “Pas mbërritjes time, pashë të gjitha flamujt e shfaqur në hyrje. Kaq shumë ngjyra, aq shumë vende që janë këtu në një frymë vëllazërie, me njerëz që flasin me njëri-tjetrin dhe shikojnë njëri-tjetrin drejtpërdrejt në sy”.
E lindur në vitin 1930 në njw familje hebre në Milano, ajo u deportua në Aushvic në moshën 13 vjeçare.
Për 30 vitet e fundit ajo ka qenë një nga dëshmitaret më aktive të Holokaustit, duke folur në mijëra shkolla në Itali.
Në janar të vitit 2018 ajo u emërua senatore për jetën nga Presidenti i Italisë Sergio Mattarella.
Dita Ndërkombëtare e Përkujtimit të Holokaustit është në 27 janar,ditën kur Ushtria e Kuqe çliroi Aushvicin.
Segre ndau përvojën e atyre muajve, duke marshuar nëpër Evropë në kushte mizore fizike dhe emocionale, duke shkelur në dëborën e ftohtë me këmbë të zbathura, duke ngrënë drekë dhe dëborë, “atje ku dëbora nuk ishte e mbuluar në gjak. Të gjithë ata që nuk mund të ecnin më, u vranë menjëherë.
“Forca e jetës është kaq e jashtëzakonshme, dhe unë mendoj se kjo është ajo që duhet të transmetojmë tek të rinjtë e sotëm, të cilët janë të hipnotizuar nga fakti se nuk ka punë ose që prindërit e tyre u japin atyre gjithçka që dëshirojnë, ndërsa jeta jo: Vazhdo dhe mos u mbështet te askush, “tha ajo me pasion.
“Ne nuk donim të vdisnim, ne ishim aq tepër të lidhur fort me jetën, “shtoi ajo.” Ne vendosëm njërën këmbë para tjetrit dhe vazhdonim të ecnim”.
Segre tha se antisemitizmi dhe racizmi kanë ekzistuar gjithmonë, por ka momente politike ku bëhet më e pranueshme të shprehen ato ndjenja dhe qëndrim.
“Parlamenti Evropian dhe mbijetesa ime nga asgjësimi më duken pjesë e së njëjtës mrekulli,” tha ajo.
Në fund të fjalës së saj, eurodeputetët u ndalën dhe duartrokitën për disa minuta.
Gjatë ceremonisë, presidenti i Parlamentit Evropian David Sassoli dhe kreu i komisionit Ursula von der Leyen gjithashtu morën fjalën për të përsëritur angazhimin e Evropës për përkujtimin e Holokaustit.
