Përfaqësuesja Shpresa ka barazuar 0-0 ndeshjen me Greqinë, të luajtur në “Elbasan Arena”, në kuadër të eleminatoreve Euro 2017. Flitet për një ekip me shumë kualitete brenda dhe që është reklamuar si një e ardhme e sigurtë e Kombëtares A, por duket se nuk është bërë ende skuadër. Rashica i besonte më shumë aftësisë së tij për të dribluar dhe herë herë e ekzagjeronte me mbajtjen e topit, ndërsa Rei Manaj u përpoq më shumë, por sidoqoftë nuk arriti ta gjejë rrjetën e portjerit Bakas. Çekiçi tentoi të luante rolin e liderit, ndërsa Rahmani dhe pas tij Strakosha bënë më të mirën e mundshme. Në përgjithësi një ndeshje me pak raste për shënim, ndërkohë që skuadra e Jupit mbetet në vendin e dytë me 9 pikë të grumbulluara, por për hir të një kalendari të çuditshëm ka zhvilluar edhe dy ndeshje më shumë (7) se përfaqësuesja U-21 e Greqisë. Por për ta mbajtur deri në fund këtë pozicion që do të thotë një mundësi kualifikimi për në finalet e Polonisë do të jetë shumë e vështirë, pët të mos thënë e pamundur, jo vetëm për numrin e pakët të ndeshjeve të mbetura, por edhe të kalendarit të pafavorshëm. Vlen të përmendet prania e një numri të konsiderueshëm tifozësh në stadiumin e Kombëtares, por që përveçse nuk ishin shumë miqësorë me kundërshtarët, u dëgjuan më shumë se një herë fyerje drejtuar Federatës, por në mënyrë fare alogjike edhe ndaj trajnerit Redi Jupi. Në vendin e parë në grupin tonë vazhdon të jetë Portugalia me pikë të plota 18 në 6 ndeshje të luajtura. Luzitanët kanë fituar sot ndaj Lihtenshteinit 4-0 dhe kanë një golavarazh të frikshëm 23:1. Nëse na ngushëllon fakti, golin e vetëm, portugezët e kanë pësuar në “Qemal Stafa” shtatorin e vitit të shkuar, kur na shkatëruan me rezultatin 6-1. Ndeshja e fundit e luajtur sot për grupin 4 ku bëjmë pjesë edhe ne ishte ajo midis Hungarisë dhe Izraelit që përfundoi po barazim 0-0.
