“Zero tolerancë ndaj dëmtimeve, punimeve e ndërhyrjeve në sistemet ujore, në basene, lumenj e në ekosistem”, ka deklaruar Ministri i Bujqësisë, Edmond Panariti, gjatë takimit me inspektorët e 3 inspektoriateve të MBZHRAU, atij të Ujrave, Peshkimit dhe Inspektorët Veterinar.
Ministri i Bujqësisë, deklaroi se, ka urdhëruar zyrtarisht, masa urgjente për të ndaluar e moslejuar më gërmimet në shtretërit e lumenjëve.
“Jemi mbledhur sot këtu, për të nisur një proces të ri, një mënyrë të re dhe një përqasje tjetër në raport me mjedisin, me dëmet që po iu shkaktohen baseneve të lumenjëve, duke vënë çdo moment në rrezik përmbytjet e tokave bujqësore, të banesave, fshatrave etj”, deklaroi Panariti.
“Nga sot, do të fillojë një epokë e re për mbrojtjen e ekosistemit dhe lumenjëve tanë. Të gjithë ne, të gjithë ju që do të jeni në terren, zero tolerancë ndaj dëmtimeve, punimeve e ndërhyrjeve në sistemet ujore, në basene e lumenj”, vijoi Ministri.
