Deputetja e qarkut të Tiranës, Oriola Pampuri, paralajmëron se do të ketë edhe personazhe të tjerë “non grata” edhe nga Partia Socialiste. Anëtarja e kryesisë së PD-së apelon se duhet vijuar beteja me kundërshtarin e vetëm politik, PS-në dhe Edi Ramën.
Në një intervistë për “Gazeta Shqiptare”, ajo ka komentuar ndër të tjera edhe konfliktin Berisha-Basha, duke i dalë në mbrojtje këtij të fundit.
“Çdo institucion ka rregulla të shkruara e të pashkruara. PD-ja ka një statut, në bazë të të cilit kryetari zgjidhet një herë në 4 vite me “një anëtar, një votë” dhe kjo gjë ndodhi, zgjedhjet u bënë, u mblodh kuvendi, zgjodhi Këshillin Kombëtar, ky i fundit zgjodhi me votë të hapur dhe me votë të fshehur kryesinë, pra çdo procedurë vijoi në bazë të statutit. Sigurisht, nuk mund të rikthehemi sa herë kemi pakënaqësi personale e të kërkojmë largimin e kryetarit të partisë. Kjo është absurde. Nga ana tjetër, as nuk mund të mendohet që të pushtohet një institucion e të përdorësh në përballje për inate personale”. shtoi deputetja.
