Banorët e pallatit në lagjen Kodra e Shtufit në Gjirokastër kanë thyer vendimin e evakuimit të marrë për ta 2 ditë më parë pas rrëshqitjes së një masivi dheu që përfshiu 3 katet e para të godinës 8-katëshe dhe kanë hyrë në banesat e tyre pavarësisht rrezikut që iu kanoset.
Mbrëmjen e sotme banorët janë ngritur në protestë duke kërkuar strehim, por sipas tyre prefekti dhe kryetarja e bashkisë i kalojnë topin njeri-tjetrit dhe nuk është gjendur zgjidhje.
“Nuk kemi ku të flemë, duam të kthehemi në banesa. Fajtorin ta gjejë shteti, ne duam strehim”, thotë një banor.
“Njëri ia hedh topin tjetrit. Prefekti na tha ikni poshtë se do iu japin shtëpi me qira. Vajtëm poshtë ajo ka ngritur duart lart se nuk ka lekë të na japë as për qira e as për gjë. Po rrimë në baltë”, thotë një tjetër banor.
