Nënkryetari i LSI, Petrit Vasili, e cilëson skandal lajmin e publikuar sot në revistën “Monitor” se “Shqipëria dha paketën më të ulët të ndihmës në Rajon për krizën e çmimeve, pas Malit të Zi”.
Në një postim në “Facebook”, Vasili thekson se Rama dhe qeveria e tij janë totalisht të paafta dhe komplet të korruptuar.
“Shqipëria jep 12 herë më pak se Maqedonia mbështetje financiare për rritjen e çmimeve! Rama & co, një qeverisje totalisht e paaftë dhe komplet e korruptuar, më e keqja e rajonit. Në momentin më të vështirë të rritjes së çmimeve rilindja përgatiti një pakete ndihme për shqiptarët vetëm sa 0.3% e PBB ndërsa Maqedonia 3.6% të PBB. Pra 12 herë më pak se Maqedonia!! Çfarë ka Maqedonia më shumë?? Asgjë! Bile ka shumë më pak, sepse nuk as dalje në det, nuk prodhon as naftë, nuk ka klimë më të favorshme nuk ka as edhe buxhet shteti më të madh”, shkruan Vasili.
Sipas tij, “Diferenca është vetëm një: Maqedonia udhëhiqet nga një qeveri e përgjegjshme, ndërsa Shqipëria nga një qeveri grabitqarësh, që rrëmben paratë e shtetit për vetë dhe oligarkët kliente të saj”.
