Këngëtarja Jonida Maliqi do performojë sot në shqip këngën “Ktheju Tokës” sonte në gjysmëfinalen e dytë të edicionit të 64-rt të Eurovision, i cili mbahet në Tel Aviv, Izrael.
Në një postim në Instagram, Maliqi iu është drejtuar të gjithë shqiptarëve duke i ftuar që ta votojnë mbrëmjen e sotme pasi sipas saj edhe ata janë pjesë e kësaj sfide.
“Sot është mbrëmja për të cilën kam, kemi punuar me shumë dashuri. Që nga emocionet e para të dhjetorit e deri në këto çaste, jam rrethuar si kurrë më parë me energjinë e një publiku të jashtëzakonshëm që përkrahu, mbështeti dhe këndoi me muaj të tërë shqip “Ktheju Tokës”. Për pak orë ngjitem në skenën e Eurovision, aty ku miliona zemra ngrihen peshë. Nëse mundeni dhe do ndiqni festivalin, ju ftoj të votoni Shqipërinë në numrin 14. Jemi bashkë në këtë sfidë, unë me fuqinë e shpirtit tim, ju me televotimin. Ju dua. Paçim fat”-ka shkruar Jonida Maliqi.
Sipas listës së publikuar, ajo do të jetë e 14-a në radhë. Nga 41 vende që konkurrojnë, vetëm 26 do arrijnë të shkojnë në finalen e së shtunës që mbahet më 18 maj.
Kujtojmë se juria shqiptare përbëhet nga Anxhela Peristeri, Eranda Libohova, Dilan Reka, Julka Gramo dhe Gent Rushi.
