Financat tentuan të mos paguanin britanikët por u tërhoqën
Në vitin 2014 mes qeverisë shqiptare dhe kompanisë britanike që menaxhonte doganat Crown Agents ka patur një betejë për pagesat. Ministria e Financave kishte vendosur të mos paguante Crown për shkak të mosrealizimit të objektivit të të ardhurave në 2014-n. Por pasi britanikët kanë kërcënuar me arbitrazh, Ministria e Financave është detyruar të paguajë. Përplasjet ku janë të përfshirë Ministria e Financave, Crown Agents, Drejtoria e Doganave dhe Avokatura e Shtetit, ishin për shkak se Ministria e Financave ishte e dyzuar nëse Crown Agents duhet të paguhej për 2014-n, pasi nuk kishte përmbushur objektivin që të rriste të ardhurat doganore me 1% të PBB-së, siç përcaktohej qartë në kontratë. Beteja në atë kohë bëhej për një këst të pagesës prej 300 mijë euro.
Historia mund të përsëritet pasi përsëri jemi në të njëjtat kushte. Në prill Crown Agents do të marrë nga Financat pagesën e fundit pasi kontrata është mbyllur. Por në vitin 2015 performanca e doganave ka rënë dukshëm si me planin dhe me faktin e vitit. Deri në fund të muajit nëntor, doganat kishin grumbulluar 7.3 miliardë lekë më pak në krahasim me faktin e vitit 2014, dhe 9.5 miliardë lekë më pak se plani i vitit. Sipas të dhënave Crown ka marrë gjatë viteve 2014-2015 rreth 6.8 milionë euro. Në prill 2016 pritet të kalojë pagesa e fundit prej 1.7 milion euro.
