2015, huamarrja për konsum në zgjerim
Gjatë vitit 2015 kredia e re për individët në formën “overdraft” është zgjeruar me 2.3 miliardë lekë, duke zënë 74 për qind të kredisë së re për individët. Shifrat jepen në raportin e fundit të Bankës së Shqipërisë për Stabilitetin Financiar për gjashtëmujorin e dytë të 2015. Të drejtën për overdrafte, përgjithësisht me dy paga, e kanë të gjithë të punësuarit në administratën shtetërore, ose në privat dhe ata mund ta aksesojnë automatikisht këtë formë kredie nga banka, në momentin që u kanë mbaruar paratë e rrogës.
Banka ka pohuar se për individët, kredia e re u zgjerua me 3.1 miliardë lekë, e mbështetur kryesisht nga zgjerimi i kredisë “Overdraft”, pesha e së cilës në totalin e kredisë së re është në rritje.
Rritja e barrës së taksave dhe rënia e fondit të pagave në ekonomi duket se, ka vështirësuar përballimin e shpenzimeve mujore vetëm nga pagat. Të dhënat tregojnë se ka një tendencë në rritje të përdorimit të overdraft të individëve.
Por gjendja e rrogëtarëve ka të ngjarë të jetë edhe më e vështirë. Në anketimin që banka ka bërë në më shumë se 1200 familje për gjendjen e borxhit të tyre ka gjetur se rreth 40 për qind e familjeve e kanë siguruar huanë përmes “burimeve formale”, banka dhe institucione finaciare dhe në 60 për qind të rasteve nga “burime joformale”, persona fizikë Brenda e jashtë vendit dhe hua nga dyqanet, kryesisht në cash.
Tre qëllimet kryesore të huamarrjes rezultojnë për “blerje e riparim prone”, për “konsum” në pjesën më të madhe dhe për “zhvillim biznesi” një sasi më e pakët rastesh. Banka e Shqipërisë ka vërejtur se kjo shpërndarje vijon të zhvendoset në favor të huamarrjes për konsum.
