Në Lezhë ka një numër të madh të mjekëve dhe sanitareve në karantinë, ndërkohë që janë konfirmuar tashmë 3 infermierë të infektuar nga Covid-19.
Rasti i katërt është konfirmuar në repartin e ortopedisë mëngjesin e sotëm në qytetain e Lezhës. Dyshimet nisën pasi pacientes që ndodhej e shtruar, nuk i ulej temperatura. Ajo i ishte nënshtruar një ndërhyrjeje kirurgjikale dhe kishte informuar bluzat e bardha se kishte udhëtuar në Itali.
Reparti i patologjisë në spitalin e Lezhës ndodhet në vështirësi tashmë, pasi një pjesë e madhe ndodhen në karantinë. Ndërkohë që në ambientet e spitalit po kryhet dezinfektimi.
Sa i përket rastit të ri me Koronavirus, ajo ka patur vizita të vazhdueshme para dhe pas kryerjes së operacionit. Edhe gjatë ditës së djeshme pas daljes nga operacioni, familjarët e saj janë afruar dhe e kanë takuar pa asnjë lloj mase mbrojtëse. Edhe këta familjarë tashmë do të karantonohen.
Ndërkohë tek qytetarët e Lezhës është parë një mungesë ndërgjegjësimi për të marrë në konsideratë masat që janë vendosur, vazhdohet të dalin në rrugë dhe të grumbullohen.
