Shërbimet me dhe pa pagesë të përcaktuara nga ERE
Operatori i Shpërndarjes së Energjisë Elektrike publikon listën me shërbimet që kryhen kundrejt pagesës, tarifat përkatëse për secilin shërbim, si edhe dokumentet që kërkohen për secilin rast. Tarifat janë miratuar nga Enti Rregullator i Energjisë dhe zbatohen nga OSHEE.
Me pagesë
Nëse dikush kërkon një lidhje të re në rrjet, OSHEE e kryen këtë shërbim kundrejt 3.600 lekë përfshirë dhe TVSH. Për këtë nevojitet numri i kontratës së furnizimit me energji elektrike, një mjet identifikimidhe formularin e aplikimit. Ndryshimi i pronësisë së kontratës kushton 300 lekë me TVSH. Abonenti duhet të paraqesë: numrin e kontratës së furnizimit me energji elektrike, formularin e qendrës së Kujdesit ndaj Klientit të plotësuar, aktin noterial që vërteton pronësinë e objektit që lidhet me kontratën në fjalë. Kërkesa për librezë të re kushton vetëm 20 lekë me TVSH dhe duhet të paraqitet numri i kontratës së furnizimit me energji elektrike dhe libreza e vjetër nëse administrohet nga klienti.
Ndërsa për zhvendosje matësi duhen 2.500 lekë me TVSH. Abonenti duhet të paraqesë në OSHEE numrin e kontratës së furnizimit me energji elektrike, formularin e Qendrës së Kujdesit ndaj Klientit, i plotësuar dhe informacionin teknik.
Pa Pagesë
OSHEE ofron edhe një sërë shërbimesh të tjera pa asnjë kosto, siç janë ankesat për mbifaturimin, ankesat për tarifat për ndryshimin e tarifimit etj. Formulari për kërkesat kundrejt pagesës plotësohet në zyrat e Kujdesit ndaj Klientit. Në faqen zyrtare, OSHEE bën të ditur se të gjithë abonentët mund të adresohen për kërkesa dhe ankesa në zyrat për Kujdesin e Klientit.
