Blihet më shtrenjtë se sa çmimi referencë në bursë
Pasi ka marrë përgjigje negative nga KESH, për plotësimin e nevojave për furnizimin me energji, Operatori i Shpërndarjes së Energjisë Elektrike ka vendosur të importojë përgjatë muajit prill 133 mijë megavat orë energji me vlerë 4.7 milionë euro. Sipas njoftimit të OSHEE energjia e blerë me një çmim mesatar 35.4 euro për megavat do të lëvrohet përgjatë gjithë muajit prill. Ajo që bie në sy është se çmimi me të cilin ka lidhur kontratat operatori i shpërndarjes së energjisë është dukshëm më i lartë se çmimi referencë i bursës së Hungarisë, që për muajin prill është 27 euro për megavat orë.
Këtë diferencë në çmim ekspertët e OSHEE, e kanë justifikuar me një sërë faktesh të tilla si: cmimi referencë i bursës ka qenë dhënë në avancë, pasi në momentin e lidhjes së kontratave ai ka qenë më i lartë. Po ashtu sipas zyrtarëve të OSHEE në cmim ka edhe kosto të tjera shtesë si çmimi i kapaciteteve transmetuese, apo qenia e kompanive fituese kompani vendase cka i detyron të rrisin cmimet për shkak të tatim fitimit, apo të normës së tyre të fitimit.
OSHEE ka njoftuar se ka lidhur kontrata me 5 kompani nga të cilat çmimin më të lirë e ka ofruar kompania AXPO me 33.8 euro për megavat ndërsa cmimet më të larta i ka ofruar NOA Energy dhe EFT Albania me 36.1 euro për megavat orë.
Ndërkohë sipas njoftimit të vetë kompanisë furnizimi i vazhdueshëm nga KESH për periudhën shkurt-mars 2016 ka bërë që kostot e blerjes së energjisë për këtë periudhë të përgjysmohen në krahasim me planifikimin.
