Misioni i OSBE /ODHIR po raporton për procesin e zgjedhjeve në Shqipëri.
Sipas raportit të OSBE/ODIHR pati vonesa dhe u vëzhguan disa parregullsi, u vërejtën votime në grup dhe ndërhyrje nga aktivistë partiakë, procedura e numërimit nuk u respektua gjithmonë, zgjedhjet u zhvilluan në kontekstin e elementëve të ndryshëm zgjedhor dhe një besimi të ulët elektoral, transparenca jo gjithnjë e garantuar.
“Edhe pse pati disa raporte nga mediat dhe disa thashetheme të cilat donin të krijonin një përshtypje të gabuar, unë jam i kënaqur që dita e zgjedhjeve ishte më pak e nxehtë sesa koha”,tha Kukan.
Në emër të delegacionit të Parlamentit Europian Eduard Kukan tha: “Vetingu dhe reforma në drejtësi të jenë të përfunduara”
Kukan u bëri apel partive politike të pranojnë rezultatin e zgjedhjeve, cilido qoftë ai.
“Të gjitha rekomandimet e OSBE/ODIHR duhet të ndiqen me prioritet. Rezultati duhet të ndiqet nga të gjitha forcat politike”, tha Kukan.
Ai ka folur për herë të parë sot edhe për përfshirjen e Presidentit të zgjedhur Ilir Meta në fushatën elektorale për zgjedhjet parlamentare të 25 qershorit si dhe deklaratat e tij.
“Më detyroni të jem diplomatik në përgjigje… Zoti Meta është zgjedhur president në parlament nga shumica kushtetuese dhe unë do iu përgjigjem që në vende të tjera presidenti nuk është anëtar partie sepse duhet të kryejë detyrat e tij dhe të paanshme për të gjithë vendin. Uluni dhe mendojeni deklaratën dhe gjejeni përgjigjen aty”, deklaroi Kukan.
