Gjykata e Posaçme kundër Korrupsionit dhe Krimit të Organizuar (GJKKO) duket se po shkon drejt një kolapsi. Si një organ i drejtësisë së re, kjo gjykatë u mirëprit dhe u pa si një “togë e hekurt” që do çonte në qeli zyrtarë të lartë dhe njerëz nga bota e krimit, por mesa duket ajo vetë po shkon drejt mbylljes.
GJKKO ka vetëm 6 gjyqtarë nga 16-të që duhet të ketë për të qenë plotësisht funksionale dhe me kapacitet maksimal.
10 gjyqtarë që duhen për të plotësuar vakancat refuzojnë prej një viti që të bëhen pjesë e kësaj gjykate të re dhe me fokus goditjen e korrupsionit dhe krimit të organizuar në nivele të larta. Aktualisht janë 6 gjyqtarë: Erjon Bani, Erion Çela, Irena Gjoka, Etleva Dedja, Flora Hajradinaj, llirjana Olldashi.
Kësaj trupe jo vetëm që nuk po i shtohen anëtarë të rinj, por dhe ata që janë, mesa duket do të rrallohen. Mësohet se gjyqtarja e posaçme Ilirjana Olldashi në tetor do të bëhet gjyqtare apeli. Në këto kushte, nëse nuk shtohen gjyqtarë të rinj, GJKKO (shkalla e parë) do të mbesë me 5 anëtarë.
