Ish-deputetja e PD-së Albana Vokshi, Genc Pollo dhe Edmond Haxhinasto janë takuar sot me delegacionin e Komisionit të Venecias që ndodhet në Tiranë për çështjen e paketës “anti-shpifje”.
Pas takimit, Vokshi shprehu qëndrimin e opozitës së bashkuar që është për anulimin e këtyre dy ligjeve, dhe jo përmirësimit apo ndryshimit të tyre, siç ka rekomanduar nga OSBE.
Vokshi tha se takimi ishte produktiv dhe se delegacioni do të dalë me një qëndrim konkret të cilin kryeministri Edi Rama duhet ta respektojë.
Pjesë nga fjala e Vokshit:
Sapo përfunduam një takim shumë frytdhënës me Komisionin e Venecias të cilët janë në Shqipëri për të ashtuquajturën paketë anti-shpifje. E them frytdhënës se komisioni do të dalë me një qëndrim. Ne shfaqëm qëndrimin tonë kundër paketës ant-shpifje. Të dyja ligjet janë të hartuara në mënyrë jo-transparente. Kjo është mënyra e Edi Ramës dhe qeverisë për të kontrolluar mediat. Atë që nuk mund ta blejë dhe kontrollojë, përpiqet t’i blejë përmes këtyre dy ligjeve. Këto ligje nuk duhet të përmirësohen, duhet të anulohen. Çdo gjë që përmend qeveria është pjesë e legjislacionit aktual ndaj nuk ka nevojë për ligje të tjera. Tashmë Rama po e bën në të gjitha mënyrat qoftë me emërimin e personave besnik të tij në AMA, edhe nëpërmjet emërimit të fjalimshkruesve apo personave që janë në varësi direkte të Edi Ramës.
Qëndrimi i PD dhe Opozitës është që këto dy ligje duhet të anulohen, duhet të grisen, se janë anti-kushtetuese.
