Sekretari i Nisma-s për Kosovën Bilall Sherifi, deklaroi se krerët e opozitës kanë biseduar sot përveç se për protestën e 17 shkurtit, edhe për takimin e thirrur nga Presidentja Jahjaga.
Sherifi tha se këtë takim nuk mund ta trajtojnë të njëjtë si atë të herëve të tjera kur thirrej opozita, pasi tani aty do të jenë të gjitha partitë politike. Për këtë takim ai ka theksuar se partitë opozitare mund të vendosin që të shkojnë edhe ndarazi dhe jo si bllok.
Më tej Sherifi tha se konsiderojnë që ky takim është i thirrur me vonesë dhe ata do të pranonin që të diskutonin vetëm për rrugën e caktimit të zgjedhjeve të ardhshme. Ai po ashtu ka deklaruar se mendësia e ish-ministrit Jabllanoviq ende gjendet në këtë qeveri, pasi sipas tij, kryeministri Mustafa i ka quajtur protestuesit ulëritës, ashtu si Jabllanoviq i kishte quajtur nënat gjakovare egërsira.
