Nga Samet Zagradi
Në qoftë se ti sillesh mirë, vishesh thjeshtë, je i varfër apo nuk je mjaftueshëm i përshtatur me trendin e ri, padyshim që ti je jashtë mode apo “old fashion” siç e quan brezi që po rritet ditët e sotme.
Në cepin e syrit dyshues që në bankat e fillores ti do të gjykohesh, në qoftë se pasioni yt është më shumë te mësimet sesa te fiskultura apo lënien e orëve të mësimit.
Në gjimnaz, në qoftë se ke mesataren, por nuk ke të dashur në të shumtën e rasteve do të quhesh provincial e më pas në jetën e përditëshme do ishe në qendër të vëmendjes, në qoftë se ti bën diçka jashtë frymës së kohës.
Ti do të quhesh fshatar, në qoftë se vjen nga fshati, malok, në qoftë se vjen nga veriu apo i dalë nga moda, në qoftë se nuk vishesh si “blogeret” a si reklamat e manikinave e të butikëve të shtrejtë.
Brinjët do t’u dhëmbin nga e qeshura, në qoftë se ti dashuron vërtetë, ashtu siç është një njeri, sidomos kur ai nuk është si ti apo nuk është pasur.
Në qoftë se ti lexon a diskuton për një libër do të quajnë të “marrë”, sepse koha e letrës ka ikur tashmë, duke mos ditur se çfarë emocioni përcjell ai libër.
Ti do jesh “old fashion”, nëse nuk bën si turma duke ndjekur modele, të cilat nuk i shkojnë aspak përshtat shoqërisë tonë. Ti nuk vlen, nëse nuk ke një makinë, një smartphone të fundit, nuk bën pushime apo një jetë luksoze.
Në Shqipëri mjafton të kesh para, nuk mund të kesh bërë asgjë ne jetën tënde, sërish të quajnë të suksesshëm.
Unë mendoj që nuk është turp të jesh nga fshati, sepse tjetër kush ka vendosur që ne të lindim aty. Këtë nuk e kemi në dorë ne. Ne kemi në dorë të ndihemi krenarë nga vijmë, të mos e harrojmë atë dhe të bëjmë vendin tonë të ndihet i vlerësuar prej nesh. Në fshat ka më shumë qytetari se atje, ku je ti që gjykon. Qytetar të bën sjellja dhe jo origjina!
Duhet të kuptojmë që nuk është turp të shkosh me autobus me pushime, të hash bukë, djathë e domate, të shijosh çdo moment pa u shqetësuar nga gjykimet e trendeve të reja. Kënaqësia me madhe është të ndihesh mirë në ato që Zoti të ka dhënë dhe ato që ti me djersë ke fituar.
Nuk është turp të jesh i varfër, turp është të bësh sikur je i pasur! Ti kurrë nuk mund të jesh jashtë mode, përderisa truri kurrë nuk del jashtë mode! Ti duhet të jesh krenar, kur në instagramin tënd nuk nxjerr shalët, por diplomat dhe arritjet e tua çdo ditë. Më mirë të promovosh një libër se sa një pjesët e tua intime. Nuk do jetë më kush kurioz për ty!? Duhet të jesh krenar, kur punon dy turne, mëson në shkollë njëkohësisht, lexon lodhesh dhe shijon çdo moment në kohën e duhur dhe jo, kur mburresh me jetën luksoze që yt atë ta siguron me mënyra të paligjshme.
Ti duhet të jesh krenar, kur në dhomën tënde ke më shumë libra se sa veshje të modës së fundit që për një sezon nuk vlejnë më.
Duhet të shijosh më shumë groshën në tavolinën e familjes tënde, sesa pjatat me fruta deti në restorantet e hoteleve në periferi të qytetit.
Duhet të shijosh çdo ditë më shumë sediljet e vjetruara të autobuzit, se sediljet e mercedesit luksos që të merr nga periferia e të sjell në shtëpi.
Të jeni të bindur se në këtë mënyrë nuk jeni aspak “Old fashion”!
Frytet e punës dhe djersës tënde do të bëjnë krenar jo vetëm ty, por edhe ata që deri tani të kanë etiketuar jashtë mode. Ti duhet të ndjekësh modele pozitiv suksesi, jo të bësh sukses duke ndjekur modele të pahijshme për veten dhe karakterin tënd. Nuk mund të jesh në modë, ku çdo ditë shalë lakuriqe zbresin nga makinat luksoze e më pas nuk dihet nga përfundojnë. Kur ditë-netët e tua i zbardh në loto, në klube nate, i pavetëdishëm për atë çka bën absolutisht që nuk je në modë.
Kur edukon keq fëmijën tënd, gënjen prindërit e tu, i bën naftën shkollës dhe jetës kurrësesi nuk mund të jesh trendy. Nuk mund të jesh në modë, kur në jetë nuk ke lexuar kurrë një libër, qoftë ai edhe me përralla, kur nuk di emrin e shkollës, të mësuesit, kur në çanta në vend të leksioneve nuk gjindet tjetër, veç produkte kozmetike, karikues, paketa cigaresh, madje herë-herë mall.
Kur ti shkon 30 vjeç, prindërit vihen në hall, marrin kredi të të shkollojnë e të të bëjnë mbarë dhe ti bën pushimet jashtë, atëherë fillo të shqetësohesh.
Moda thotë që duhet t’ia dalësh vetë dhe të ndihesh krenar me arritjet e tua!
