Pas fushatës intensive nga Ambasadorja Besiana Kadare dhe stafi i saj, eksperti shqiptar Prof. Gentian Zyberi zgjidhet qysh në raundin e parë si një nga nëntë anëtarët e rinj të Komitetit.
Në datën 14 qershor 2018, në OKB-Nju Jork u zhvillua takimi 36 i Shteteve Palë në Konventën për të Drejtat Politike dhe Civile (International Covenant on Civil and political Rights – ICCPR), ku Shqipëria ka aderuar që në vitin 1992. Gjatë takimit u zhvilluan dhe zgjedhjet për nëntë anëtarët e rinj të Komitetit për të Drejtat e Njeriut për periudhën 2019-2022, ku kandidonte dhe eksperti nga Shqiperia Prof. Gentian Zyberi.
Kandidatura e Prof. Zyberit ishte paraqitur nga Qeveria shqiptare në janar 2018 dhe fushata për zgjedhjen e tij u krye nga Misioni i Shqipërisë pranë OKB-së në Nju Jork. Përfaqësuesja e Përhershme e Shqipërisë në OKB, Ambasadorja Besiana Kadare, dhe stafi i saj kanë zhvilluar një fushatë intensive gjatë 4 muajve të fundit për të lobuar me të gjitha vendet anëtare të OKB-së që kanë ratifikuar Konventën (gjithësej 173).
Gentian Zyberi është profesor i të Drejtës Ndërkombëtare dhe të Drejtave të Njeriut në Universitetin e Oslos në Norvegji (Fakulteti i Drejtësisë) si dhe Anëtar i Gjykatës së Përhershme të Arbitrimit, në Hagë, Hollandë.
Gjatë 15 viteve të fundit, ai ka botuar dhe dhënë mësim universitete të ndryshme, nga Hollanda, në Norvegji, SHBA, Kinë dhe Shqipëri.
Në kuadër të fushatës edhe Prof. Zyberi e vizitoi dy herë selinë e OKB-së për të zhvilluar takime dypalëshe me përfaqësues të vendeve palë në Konventë dhe ekspertë të së drejtës ndërkombëtare humanitare, ku paraqiti dhe vizionin e tij për punën e Komitetit dhe rolin e Shqipërisë në të.
Në zgjedhjet që u zhvilluan në 14 qershor kandidonin 17 kandidatura për 9 vende të lira dhe kandidatura e Prof. Zyberit u kualifikua që në raundin e parë me 94 vota, duke lënë pas kandidaturat e SHBA-ve, Rusisë, Holandës, Ekuadorit, Armenisë, Uruguait, Etiopisë, Namibise etj. Krahas Shqipërisë në Komitet u zgjodhën edhe këto 8 vende: Franca, Japonia, Greqia, Sllovenia, Tunizia, Guyana, Kili dhe Uganda.
Është hera e parë që Shqipëria zgjidhet në këtë organ prestigjioz të OKB-se për të drejtat e njeriut.
Duke folur lidhur me këtë ngjarje për gazetën “Illyria”, Ambasadorja Besjana Kadare u shpreh: “Kjo ishte një fitore e madhe për diplomacinë shqiptare shumëpalëshe dhe provë e pakundërshtueshme se me angazhim dhe punë, është e mundur që edhe një vend i vogël si Shqipëria të fitojë kundrejt vendeve shumë më të mëdha dhe të fuqishme”.
