Krizat e njëpasnjëshme që po kalon bota po përkeqësojnë diskriminimin gjinor në mbarë globin, e për pasojë do të duhen rreth 300 vjet që barazia gjinore midis burrave dhe grave të arrihet, thekson raporti i OKB-së.
“Me ritmin aktual të progresit do të duhen 286 vjet për të mbyllur boshllëqet në mbrojtjen ligjore dhe eliminimin e diskriminimit gjinor,” vë në dukje Departamenti i Kombeve të Bashkuara për Çështjet Ekonomike dhe Sociale (UNDESA).
Njerëzimit gjithashtu do t’i duhet të presë deri në 140 vjet derisa gratë të përfaqësohen në kushte të barabarta në pozitat e pushtetit dhe udhëheqjes në vendin e punës dhe të paktën 40 vjet për përfaqësimin e tyre të barabartë në parlamentet kombëtare, thuhet në raport.
Megjithatë OKB-ja ka vendosur objektivin për arritjen e barazisë gjinore deri në vitin 2030.
”Sfidat globale si pandemia Covid-19 dhe pasojat e saj, konfliktet e dhunshme, ndryshimet klimatike dhe problemet e shëndetit seksual po përkeqësojnë më tej pabarazitë,” shkruan raporti.
Deri në fund të vitit 2022, rreth 383 milionë gra dhe vajza do të jetojnë në varfëri ekstreme, me më pak se 1,90 dollarë në ditë. Shifra përkatëse për meshkujt vlerësohet në 368 milionë, vijon deklarata, duke theksuar si alarmante përmbysjen e trendit të uljes së varfërisë në botë.
Më shumë se 1.2 miliardë gra dhe vajza të moshës riprodhuese jetojnë në vendet ku ekzistojnë kufizime për abortin.
“Është thelbësore që ne të bashkohemi për të investuar te gratë dhe vajzat për të përshpejtuar përparimin që është bërë,” komentoi Seema Bachus, drejtoresha ekzekutive e UN Women.
