Vetëm një pjesë e vogël e popullsisë botërore – ndoshta 2% ose 3% – ka zhvilluar antitrupa që tregojnë se janë infektuar dhe janë imunë ndaj Covid-19.
“Lehtësimi i masave nuk nënkupton fundin e pandemisë,” tha kreu i OBSH, Dr. Tedros Adhanom Ghebreyesus në një konferencë për shtyp në Gjenevë, të hënën. “Izolimet thjesht pakësojnë intensitetin e pandemisë.”
Ama, testet serologjike që zbulojnë sa përqind e popullsisë është infektuar dhe ka zhvilluar antitrupa – që do të thotë se janë imunë – sugjerojnë se ky numër është i vogël.
“Të dhënat e tanishme thonë se një përqindje e vogël e popullsisë është infektuar,” tha Tedros. “Jo më shumë se 2%-3%.”
Një studim i kryer në Santa Clara, California nga Universiteti Stanford zbuloi se 50 deri në 85 herë më shumë njerëz ishin infektuar me virusin sesa kanë treguar shifrat zyrtare.
Qarku i Santa Clara kishte 1.094 raste të konfirmuara të Covid-19 në kohën kur u krye studimi, por testet e antitrupave tregojnë se midis 48,000 dhe 81,000 njerëz ishin infektuar në fillim të prillit, shumica e të cilëve nuk kanë shfaqur simptoma.
Një studim në Hollandë i 7,000 dhuruesve të gjakut zbuloi gjithashtu se vetëm 3% kishin antitrupa.
Dr. Maria Van Kerkhove, eksperte e sëmundjeve infektive, tha se edhe nëse sipas analizës një person ka antitrupa kundër Covid-19, nuk do të thotë se është imun.
“Shumë vende sugjerojnë përdorimin e testeve serologjike për të matur nivelin e imunitetit,” tha ajo. “Por tani për tani, nuk kemi prova se një test serologjik vërteton imunitetin e dikujt apo siguron se është i mbrojtur nga një infektim i dytë.”/www.theguardian.com/
