Basha:Kam keqardhje të konstatoj se pala tjetër erdhi me konkluzione dhe fjalim të përgatitur jo për të kërkuar zgjidhje por për të krijuar alibi dhe per ti vënë fajin kundërshtarit
Ka përfunduar pa marveshje takimi Rama-Basha, i zhvilluar për rreth tri orë në pallatin e Kongreseve. Pas takimit, Rama tha se PD nuk e do reformën në drejtësi. Kryeministri theksoi se mazhoarnca nuk pret më, do ta votojë reformën.
Ne ishim mikëpritësit por ishte dëshira e miqve të dilja përpara që nuk është shumë e natyrshme që mikpritësi të lërë mikun brenda. Më vjen sinqerisht keq që nuk arritëm të bindim PD për të votuar sëbashku draftin e shkruar bashkarisht me partnerët tanë strategjik të reformës në drejtësi, por më vjen mirë tu them gjithë shqiptarëve që i bëmë gjithë përpjekjet e mundshme, për tu dhënë kundërshtarëve politikë një mundësi reale kompromisi, pa cënuar përmbajtjen thelbësore të kësaj reforme. Dhe me përpjekje të mundshme nuk kam parasysh vetëm këto orë që kaluam sot me një diskutim të hapur dhe të drejtëpërdrejtë, por kam parasysh një vit e gjysëm proçes.
Drafti që kishim në tryezën e diskutimit ishte ai i diskutuar në Komisionin e Posaçëm të reformës në drejtësi i shoqëruar me një plan disa pikësh që u ofrua nga ekspertët amerikanë dhe europianë për të lehtësuar afrimin mes palëve. Ne e kishim pranuar 100% këtë plan ku përfshihej dhe shumica e cilësuar e dy të tretave që është kërkuar pa pushim nga PD pas leximit të parë të raportit të Venecias.
Për habinë e shumë kujt ndoshta, por jo timin, PD e refuzoi këtë ofertë që e barazon shumicën dhe opozitën në përzjedhjen me votë të kandidatëve për pozicione të caktuara në sistemin gjyqësor. Unë nuk u habita sepse nuk hyj tek ata që mendojnë se PD e do reformën e drejtësisë, por pikërisht sepse kam menduar kështu që ditën e parë, kam qenë jashtëzakonisht më i duruar se herë tjetër dhe kam kërkuar nga të gjithë durimin më të madh. Të njëjtën gjë ka bërë dhe aleati ynë”, tha Rama.
Por kryetari i PD-së theksoi të kundërtën. Basha deklaroi pas takimit se shumica refuzoi konsensusin për vendet e rezervuara të propozuar nga Venecia.
Në deklaratën për shyp, Basha tha se “çdo akt unilateral do atakohet me dështimin e sigurtë dhe çdo dështim do të thotë shtyrje e reformës në drejtësi”.
“Erdha sot në këtë takim me përfaqësuesit më të lartë të mazhorancës, me vullnetin për të kërkuar dhe ofruar zgjidhje, zgjidhje që do t’i japin shqiptarëve një drejtësi që lufton dhe nuk mbron krimin e organizuar. Partia Demokratike ka pasur vetëm një kusht që prej ditës së parë: moskapjen politike të sistemit të drejtësisë. Kapja politike është korrupsioni i gjithë korrupsionit, është baza e çdo të keqeje. Një drejtësi e cila bëhet palë me të fortin, me të pasurin, me kriminelin, me të korruptuarin, është drama e përditshme, por është padyshim jo shkak por pasojë e korrupsionit politik. Nëse politika nuk do t’i mbronte Shullazët, Kokëdhimët, Habilajt, etj me shokë me domenet e tyre respektive të aktivitetit të tyre kriminal apo të korrupsionit që vjedh miliona euro çdo javë nga xhepat e taksapaguesve shqiptarë, pa dyshim që drejtësia do të vepronte.
Parafolësi akuzoi PD se nuk do reformën në drejtësi por faktet tregojmë të kundërtën. Ne detajuam qëndrimet për vendet e rezervuara. Nuk është argument por kaprico. Opozita vjen më modelin e vendeve të rezervuara të ofruar nga Venecia e OPDAT. E kundërta është kapje politike e sistemit. Kam keqardhje të konstatoj se pala tjetër erdhi me konkluzione dhe fjalim të përgatitur jo për të kërkuar zgjidhje por për të krijuar alibi dhe per ti vënë fajin kundërshtarit. Ajo mbart përgjegjësinë e abortimit ne qastet e fundit të kompromisit. Cdo akt unilateral do atakohet me dështimin e sigurtë. Cdo dështim do të thotë shtyrje e reformës në drejtësi.
