Nga Mentor Kikia
Protesta në natën e dytë jashtë kontrollit. Grupe të rinjsh iu sulën çdo gjëje që gjenin përpra, duke e shkatërruar. Një kaos i vërtetë. Shumëkush po përpiqet të analizojë se çfarë duhet të bëjë policia. Nëse është shumë, apo pak e dhunshme. Shumë të tjerë nxituan të thonë se nuk është protestë kjo, këta duhen zënë me dru, se po prishin qytetin.
Por jo! Kjo nuk është punë policie, as drejtësie, as punë Lleshi jo që jo…
Ne po përpiqemi t’i gjejmë zgjidhjen një problemi që tani po e kërkon vetë zgjidhjen. Ose më saktë që, në përpjekje për t’u vetëzgjidhur, po na vë zjarrin të gjithëve. Ata të rinj nuk janë aty thjeshtë për dorëheqjen e ministrit të brendshëm. Madje, mund të themi se as duan t’ia dinë për të.
Kjo valë zemërimi që u demonstrua në Tiranë është vetëm maja e ajsbergut. Ajo ishte sot edhe në Korçë, dje ishte edhe në Elbasan. Kjo është një gjeneratë e mbushur me maraz, jo thjeshtë me policinë, ministrin apo kryeministrin; kjo është gjenerata e zhgënjyer, e mashtruar, e pashpresë, me të cilën e për të cilin shteti nuk ka punuar fare. Shumë prej tyre nuk kanë arsimim, as profesion, as punë, e asnjë shpresë se një ditë mund ta kenë. Ata nuk urrejne pemën e festës dhe as stolat, ata urrejnë pushtetarin si model, që i vjedh, i mashtron, i merr paratë dhe shpresën dhe natë e ditë del nëpër ekrane televizorësh duke treguar llogje për zhvillimin e Shqipërisë. Ata urrejnë korrupsionin, edhe pse nuk i njohin të korruptuarit kush janë. Ata janë të mbarsur me zemërim, me këdo e për gjithçka, edhe me stolin, edhe me semaforin, edhe me pemën, edhe dritat.
Ju në qeveri, mo u lodhni kot ta quani këtë vepër të opozitës. As mos mendoni se zgjidhja është mbushja e burgjeve me adoleshentë. Sa më shumë të mendojmë ne të “zgjuarit” që kjo është punë huliganësh që duhen rrahur, aq më keq është. Sa më shpejt ta kuptojmë se kjo është pasoja më e rëndë e keqeverisjes në këtë vend, aq më mirë do të jetë, që të fillojmë të mendojmë se ç’duhet bërë.
